خطوة رقم 27 : اللي عايزه ربنا ولا اللي أنت عايزه ؟

تمني

حقائق غريبة عن غابة البشرية :اللي ما بيلاحظوش الملايين :

البشر بيقولوا أنهم بيتمنوا ينفذوا مشيئة الله , و العجيب أن دي نفس الحاجة اللي عايزين يعملوها . فيرنون هاورد .

تعليقي :

مقولة النهاردة بتوضح التناقض اللي أحنا عايشين فيه , بنقول الحاجة و نعمل عكسها , عايزين نكون قريبين من ربنا مثلاً , و لولا أن من أسس ده , الرضا بمشيئته , لكن من جوا أحنا معترضين علي كل حاجة , من أصغرها لكبيرها , و لو الدنيا ممشيتش ذي ما أحنا عايزين , عشان أحنا متخيلين أن الحاجة اللي عايزنها تحصل هي الصح و هي الحق و هي اللي المفروض تحصل , كأننا بنفرض نفسنا علي قوانين الكون الثابتة , ايه اللي متوقع أنه يحصل ؟

  ولا حاجة غير الحكة الصعبة جداً اللي بتحسها جوا عقلك كل مرة أفكارك بتعارض اللي أنت شايفه , و اللخبطة و غيظ , و كل الراحة اللي ممكن تحسها لو بطلت تعمل كده .

تخيل نفسك ركبت عربية , و ربطت في العربية في مكان قوي , سلسلة طويلة , حطيت في أخر السلسلة حاجة ذي هلب السفينة , وزنها تقيل و كل مرة بتتحرك بالعربية , بتحس أنها تقيلة جداً و دايماً بتحك في الأرض و في العربيات اللي حواليك , و كل مرة بتحك , تقول في دماغك المفروض ما تحكش في الأرض , المفروض ما تخبطش في حد و تعمل مشكلة , المفروض متعملش الصوت المزعج ده , أنا قربت أتجنن من صوت الحكة بتاعها ….

العربية دي هي عقلك , و كل مرة بتعتقد أن حاجة تانية المفروض تحصل , بتعذب نفسك بحاجة مش منطقية أو ممكن تقول مجنونة أصلاً أنك تعملها , لكن أنا مثلاً كنت بأعمل كده في حاجات ما تتعدش , و كنت بأعملها أوتوماتيك , ما كنتش مصدق أيه أنا قد أيه معترض علي مشيئة الله , لأن مشيئة الله أن كل حاجة تكون ذي ما هو عاملها , مش ذي ما أنا عايزها .

من التدريبات اللي بدأت أعملها من نصايح فيرنون , أني المفروض أن أراقب أفكاري طول اليوم , , أشوف بالذات , الأنتقادات اللي بأنتقدها للناس و مش حاسس بيها من كتر ما بقت طبيعية , و عشان أعرف فعلاً أنها بتضرني , أحاول الأحظ أنا بأحس بأيه , أو رد فعلي علي وشي مثلاً بيكون عامل ازاي , و أنا بأعمل كده .

طبعاً ذي كل الناس كنت فاكر نفسي مابعملش كده , لكن ذي ما فيرنون قال , لو كتبت لسته في عدد المرات اللي عملتها في اليوم الواحد ممكن تكتب خمس صفح , و كلها حاجات صغيرة جداً , أيه صوت المنبه الفصيل ده , يا باي هوا مفيش غير النغمة الفصيلة دي عشان أصحي عليها عالصبح , أنام ربعاية كده تاني , قبل ما أقوم , ييييا أنا لازم أقوم عشان أروح الشغل أيييي , عايزين راحة بقي من الهم ده , الحاجة جية تقومني , مش شايفاني نايم ما تسيبني أنام شوية بقي أي  , أنا تعبان أوي , أيه ده القميص مش مكوي , هو مفيش حاجة متظبطة أبداً , أيه ده أنا موبايلي فين !!!!!!! , يا باي الطريق زحمة أوي شكلي هأوصل بكرة أن شاء الله , يا ريت يلغوا الشغل أنهاردة عشان أروح أنام شوية , ايه طريقة السواقة دي , ناقص يسوق العربية بالعرض , يا سلام , ده أنت غلبت الزحلفة بسرعتك دي يا أخي , حرام عليك , أهلاً الأستاذ الدكتور الرئيس العالم الفائز بجايزة نوفل للعلوم التقنية شرفنا يا جماعة و بيحكيلنا قصة نجاحه للمرة 100 مليون النهاردة , هو الوقت بطيء كده ليه أنهاردة اليوم مش عايز يجري , بيبصلي ليه الأخ ده , هو ماوراهوش شغل ولا أيه , أيه البوهيا اللي علي وشها دي , واضح أن عنوان السيرك كان غلط , يا رب أرحمنا من الخمسة كيلو برفان اللي بيستحمي بيهم قبل ما بييجي الشغل كل يوم ….الخ الخ .

أنا حاولت أديكم فكرة عن الطريقة اللي معظمنا بيفكر فيها و بيعترض بيها علي أشياء بسيطة كل يوم , مهما كانت صغيرة عشان خاطر يبين أعتراضه علي  اللي بيحصل , و يا سلام لو أنت محتاج قبول اللي قدامك , و صعب جداً تكون صريح , هتلاقي الصوت اللي جوا عقلك زاد خمسين مرة , أنت ممكن تكون منعتني من أني أتكلم , بس ما منعتنيش أني أفكر , و كل حاجة بنفكر فيها بالطريقة دي , بتعتبر ذي الوزن اللي عمال بيزيد و بعد لما وزنه يوصل لوزن كبير بنبدأ نحس بكمية عذاب رهيبة من كتر الحك اللي بنحكه في نفسنا , في ناس حوالينا شايفة أننا عايزين نتغير , و في نفس الوقت نفسنا أنهم يتغيروا في حاجات معينة , بس السؤال هنا , هو التغيير فعلاً سهل عشان أي حد يعمله ؟

في الحقيقة لأ , في أغلبية الوقت بنطلب حاجات من الناس أحنا نفسنا مش عارفين نعملها ,واحدة تقول ,  أنا نفسي الناس تفهمني , وهي مش فاهمة هي عايزة أيه أصلاً , و كمان متوقعة أن الناس تقرأ أفكارها , أو الشخص اللي عارف أن دي طبيعة اللي قدامه , و أنه ما يقدرش يتحكم فيها , و لولا كده شايف أنه المفروض يكون عنده قدرة التحكم فيها , لولا أن موته و سمه أن حد يقوله يعمل حاجة , أو أنك مترضاش و تكره أن حد يحكم عليك , و لو بكلمة , و رايح جاي عامل نفسك فيها أبو العريف , تعرف أن اللي بيمثلوا أنهم دايماً الضحية من أكتر الناس عنف من جوا , لأنهم في اللحظة اللي بيعتقدوا كده , يعتبر بقي عندهم مبرر لأي نوع من العنف عشان حاسين أنهم أتظلموا لولا أنهم ظلموا نفسهم , أو الشخص اللي يطلب منك تعمل حاجة و لو معملتهاش يجعر في وشك و بعد كده يقولك أصل أنا عايز مصلحتك و بأحبك , معظم الوقت اللي الغضب بيطلع عليه عشان معملتش اللي هو عايزه مش اللي ربنا عايزه (لأن الأستثناء غضب الرسول (صلي الله عليه و سلم ) عند أنتهاك حرمات الله مش لنفسه أبداً) و من هنا ده بيوضحلك قد أيه علاقات الزواج اللي مليانة غضب من الطرفين عشان كل واحد مش متقبل التاني علي طبيعته و كل واحد بيتنافس عشان يخلي اللي كلامه اللي يمشي و بعد كده التعذيب النفسي ده يسموه حب , لو لاحظت هتشوف كويس جداً قد ايه هو بعيد جداً عن الحب كل البعد , بس في نفس الوقت هو أعظم أستاذ ليك عشان تعرف بظبط لو أنت رامي هلب ورا عربيتك و معلقه و مش واخد بالك , لأنك لما هتاخد بالك هتعرف تشيله , و لو شيلته , صوت الحكة الرهيب اللي كنت بتسمعه هيبدأ يقل , و هتبدأ تستريح درجة درجة كل ما وزن الهلب ده يقل لغاية لما ما يكونش في أي وزن .

و من هنا عرفنا النهاردة حاجتين , التناقض الغير واعي اللي أحنا عايشين فيه , ازاي أننا بنقول أننا عايزين نكون صح , والصح ده هو المصلحة مش الصح الحقيقي , و كل ده عشان نحس أننا بتحكم في حياتنا , لكن في الحقيقة نفسنا الأمارة مسيطرة علينا بأفكارها , و من هنا مألهينها بدل ما نأله الأله الحقيقي .

و تاني حاجة , أننا طول اليوم بننتقد نفسنا و كل حاجة حوالينا بشكل لا واعي ذي اللي معلق هلب سفينة كبير بسلسلة في ظهر العربية , و بنشتكي طول اليوم من حكها و الصوت الصعب اللي بينتج من ده لولا أننا سببه ,عشان بنعارض الواقع .

و الحل من كل الكلام ده , أنك بكره أو الأسبوع الجاي كله , لاحظ بظبط أنتقدت كام حاجة , و أيه في اليوم كله من أصغر لأكبر حاجة , و لو حتي أضطريت أنك تجيب ورقة و تكتب , و ذي ما أنا أتفاجئت هتتفاجئوا جداً لما تشوفوا قد أيه أنتم شكايين و بتعارضوا الواقع و رد فعلكم المؤلم كل مرة بتعملوا كده , و ده بداية الراحة النفسية أنك تبدأ تشوف كل ده , عشان تقطع السلسلة أن شاء الله .

About Ahmad Salahudin

La Ilaha Ila Allahu
هذا المنشور نشر في 1-حقائق غريبة عن غابة البشرية. حفظ الرابط الثابت.

اترك تعليقًا

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

شعار ووردبريس.كوم

أنت تعلق بإستخدام حساب WordPress.com. تسجيل خروج   /  تغيير )

Google photo

أنت تعلق بإستخدام حساب Google. تسجيل خروج   /  تغيير )

صورة تويتر

أنت تعلق بإستخدام حساب Twitter. تسجيل خروج   /  تغيير )

Facebook photo

أنت تعلق بإستخدام حساب Facebook. تسجيل خروج   /  تغيير )

Connecting to %s