الخطوة رقم 6 : الظلمات هي النور ؟

zolomat

الأنسان عنده الوسيلة المثالية عشان يحافظ علي ظلماته و الوسيلة دي أنه يقول أن الظلمات هي النور . فيرنون هاورد

تعليقي :

الظلمات هي عدم الوعي , عمرك كنت في أوضة ضلمة كحل , و ما كنتش شايف أي حاجة في الأوضة و حاولت تتحرك عشان تجيب موبايلك عشان تنور , لقيت نفسك أتخبطت في كرسي أو رجلك أتخبطت في السرير لولا أن الأوضة دي أنت عايش فيها بقالك سنين طويلة , و برضه الضلما ليها التأثير ده !

قارن ده بقي بالعكس , اللي هوا أن الأوضا تبقي منورة كلها , سبحان الله , ماكنتش شايف ولا حاجة في الأوضة غير تفاصيل بسيطة أوي للحيطان و معظم الحاجات اللي جوا الأوضة ما كنتش واضحة و بعد كده طلع في حاجات كتيرة جداً في الأوضة  , ماكنتش شايفها و ليها تفاصيل ما تتعدش ما كنتش حتي تقدر تتخيل أنها موجودة و كل ده بسبب أنه ماكنش في نور .

أيه سبب أني أتكلمت عن الموضوع ده بالتفصيل ؟

لأن العقل عامل ذي كده بالظبط ببساطة .

كمية النور اللي داخلة فيه كل ما تكون أكتر كل ما تكون كل حاجة عن أفكارك و حياتك تكون واضحة و سلسة أكتر

و كل ما الضلمة تكون أكتر كل ما تحس بالعمي و الخوف و عدم وضوح الدنيا و اللخبطة بتكون أكتر

بمعني أيه ؟

شخصيتك مش معقدة ذي ما أنت متخيل , هي عبارة عن أفكار + أحاسيس متجمدة و ثابتة في مكانها عشان أنت مصدقها بسبب الدلايل اللي أنت مجمعها  سواء حقيقية أو لأ , و كلها متجمعة في مكان واحد في أوضة العقل اللي تعتبر فيها تجميعة كل ده .

عقلك الباطن برضه مش معقد , الجزء اللاحسي اللي بيتحكم في جسمك و الأعضاء ده جزء بس يعتبر ملناش علاقة بيه , و الجزء التاني عامل ذي الكمبيوتر اللي بيشغل مجموعة برامج محددة بناءاً علي المعتقدات بتاعتك .

عقلك الباطن أو اللاواعي هو عبارة عن الأوضة دي بكل اللي فيها من ساعة ما كنت صغير لغاية لما كبرت .

و فيها كل حاجة متخزنة و علي أساسها بتشوف الحياة .

الكلام ده مش استعارة مكنية علي فكرة , الكلام ده تقدر تستخدمه كخريطة تستكشف فيها بنفسك الأوضة دي .

بجد ؟

اه , عشان أن عملت كده و لو أنا عملت كده أي حد يقدر يعمل كده .

طب و ليه أصلاً , مانا تمام اهو و الحياة حلوة 😀 ?

و هو ده السبب الرئيسي أنا أتكلمت عن الفرق ما بين الأوضة الضلما و الأوضة المنورة  , و عشان أوضح ده أكتر تخيل أنك كنت عايش في عصور الظلام لما كانوا لسه مستكشفين النار , و بالنسبة لهم الأختراع ده كان ممكن ياخد جايزة نوبل , و بقدرة قادر , في واحد جه من عصرنا من المستقبل من 2020 مثلاً باستخدام اَلة الزمن , و كلهم طبعاً أستغربوا أيه المخلوق ده , و قالهم أحنا عايشين في عالم ممكن نشوف أي حتة في العالم و نكلم أي شخص , و كمان عندنا كهرباء بتخلينا نولع النور بضغطة زرار في أماكن حجمها كبير …..الخ الخ .

طبعاً تخيل نفسك أنك لسه كنت بتتعلم ازاي تولع نار و خدت فيها ساعتين  , و طالعلك واحد لابس لبس مهرج و بيقولك باولع النور بزرار و لون أبيض , الطبيعي أنك هتقوله يا عم بطل أشتغالات فينا , بدل ما نولعك أحنا , فلما لقاهم بدأوا ياخدوا الموضوع أنه اهانة و أنه بيستخف بعقلهم , لدرجة أنهم ممكن يؤذوه , قالهم طب بصوا أنا عندي الأيباد أوريكم أزاي أن كل ده موجود و اللي نفسه يرجع معايا و يعيش الحياة السهلة دي أنا مستعد .

فلما وراهم النور اللي فيه , و فرجهم علي فيديوهات , الناس كلهم ما كنوش مصدقين , و بدأوا يخافوا , في ناس قالت عليه ساحر , و في ناس تانية أفتكرت أنه اله عنده قوي خاصة و نزل الأرض و كانوا عايزين يعبدوه لولا أنا قالهم يا جماعة و الله دي حاجات عادية , و طبعاً الرؤوساء بتوع القبيلة كانوا عايزين يموتوه  عشان هياخد المناصب بتاعتهم منهم لولا أنه كان  بس بيوريهم حاجة ممكن تريحهم , و كان مستعد أنه ياخد أي حد معاه , لكن للأسف كلهم مش قادرين يستوعبوا ما عدا راجل و ست من كل دول هما اللي سمعوا كلامه و حبوا أنهم يرجعوا معاه , لأنهم نفسهم في الراحة دي و كانوا صرحاء مع  نفسهم كفاية أنهم يعترفوا أن حياتهم مش مريحة و أنهم مش فاهمين ازاي حاجة ذي دي ممكن تحصل , عايزين يستفيدوا منها.

و هما كاونوا الناس الوحيدة اللي ما خلتش تجاربها و الأفكار اللي هما عارفينها من الماضي تحدد حقيقة المعلومات الجديدة اللي هما شافوها , بمعني أنهم ما أعتقدوش أنه مستحيل يكون في حاجة ذي الكهرباء و النور , و من هنا كانوا متفتحين للفكرة نفسها ,و ما كدبوش علي نفسهم و الفوا هي عبارة عن أيه من خيالهم و حددوا أهميتها علي الأساس ده , و راحوا رفضوها لأنها سحر أو تخلف أو حاجة الكبراء بتوعنا شايفينها غلط و ما دام قالوا غلط تبقي غلط .

أيه علاقة القصة دي بالعقل و الأوضة ؟

أنه لو كل اللي أنت تعرفه طول حياتك جوا أوضة العقل هي النار البدائية اللي كانت موجودة أيام الكهوف و الضلما و الجهل اللي جواها , و كل اللي أنت عرفتهم و بتحترمهم كانوا هما ده اللي عارفينوا برضه , لو جيت أنا و قلتلك , أنت ممكن توصل كهرباء جوا و تولع النور و كل العفاريت و الحاجات المخيفة اللي جوا الكهف هتتخلص منها بضغطة زرار و النور هينتشر جوا الأوضة و هتشوف حاجات عمرك ما شفتها .

الطبيعي أنك عشان الموضوع ده خارج دايرة معرفتك , و عمرك ما شفته , هتبدأ تكون أفكارك عنه من دايرة معرفتك اللي  مافهاش علم عنه ذي الحمامة اللي شافت طاقية أفتكرتها عشة غريبة , لأنها ما تعرفش أستخدام الطاقية , و من هنا هتكون أفكارك و تخيلاتك ذي الناس اللي في القرية , يا تعظم الشخص ده , يا ترفضه و تقول عليه مجنون أو ساحر أو ملبوس أو تكون شايفه تهديد لمصلحتك , كل ده لأنك شايف أنه مستحيل يكون كلامه صح  و ذي ما بيقول يكون النور بتاعه نور مش ضلمة .

و طبعاً في كل الحالات اللي فوق مفيش حد في القرية أتغير , كلهم فضلوا عايشين في الجهل و الضلمة و تعب الحياة البدائية عشان فاكرين أنهم عارفين كل حاجة أو بيسمي وهم المعرفة أو تسمية الظلمات بالنور .

الناس الوحيدة اللي أستفادت اللي كانوا صرحاء مع نفسهم و أعترفوا بتعب الحياة البدائية و عدم فهمهم للموضوع , و أنهم متفتحين أنهم يفهموه و يرجعوا يعيشوا معاه و يتعلموا كل حاجة .

نفس الفرصة دي قدامك النهاردة هتكون ذي الناس اللي في معظم القرية , ولا هتكون  متفتح و صريح و مش بتمثل علي نفسك ؟

الأختيار أختيارك , النور جوا أوضة العقل هو الوعي الذاتي , و لما الوعي الذاتي للأفكار و المعتقدات يزيد , اللي بيحصل أنك بتبدأ تشوف كل المنغصات اللي كانت في حياتك ذي الكرسي أو السرير اللي رجلك خبطت فيه لما الأوضة كانت ضلمة , و من هنا كل مشاكلك بتبدأ تتحل , لغاية لما ما يكونش في مشاكل اطلاقاً , و ساعتها هتسأل نفسك ازاي أنا كنت عايش قبل كده من غير نور !

اللي نقدر نستفيده من الخطوة المهمة دي هي التفتح للأفكار الجديدة مع الصراحة مع نفسنا , هي الطريقة الوحيدة اللي نقدر نشوف بيها الضلمة ضلمة و النور نور .

About Ahmad Salahudin

La Ilaha Ila Allahu
هذا المنشور نشر في 1-حقائق غريبة عن غابة البشرية. حفظ الرابط الثابت.

اترك تعليقًا

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

شعار ووردبريس.كوم

أنت تعلق بإستخدام حساب WordPress.com. تسجيل خروج   /  تغيير )

Google photo

أنت تعلق بإستخدام حساب Google. تسجيل خروج   /  تغيير )

صورة تويتر

أنت تعلق بإستخدام حساب Twitter. تسجيل خروج   /  تغيير )

Facebook photo

أنت تعلق بإستخدام حساب Facebook. تسجيل خروج   /  تغيير )

Connecting to %s